సచివాలయాలకు పర్యవేక్షకులొస్తున్నారు!

Updated on: 2025-11-18 09:21:00

400 మంది డిప్యూటీ ఎంపీడీవోలకు త్వరలో బాధ్యతలు

మున్సిపల్, జిల్లా స్థాయిలోనూ అధికారుల నియామకం

అమరావతి: గ్రామ, వార్డు సచివాలయాలకు మండల, మున్సిపల్, జిల్లా స్థాయిలో పర్యవేక్షకులొస్తున్నారు. తొలి దశలో మండల స్థాయిలో పర్యవేక్షక అధికారుల నియామకాన్ని త్వరలో చేపట్టనున్నారు. రెండో దశలో మున్సిపల్, జిల్లా స్థాయిలో అధికారులను కేటాయిస్తారు. ఈ నెలాఖరులోగా మొత్తం నియామక ప్రక్రియ పూర్తి చేయాలని సచివాలయాలశాఖ యోచిస్తోంది. సచివాలయాలపై మండల స్థాయి పర్యవేక్షణాధికారులుగా రాష్ట్ర వ్యాప్తంగా 660 మంది డిప్యూటీ మండల పరిషత్ అధికారులను నియమించనున్నారు. గ్రేడ్-1 పంచాయతీ కార్యదర్శులు, జడ్పీ, మండల కార్యాలయాల్లో పరిపాలన అధికారులకు రాష్ట్ర పంచాయతీరాజ్శాఖ డిప్యూటీ ఎంపీడీవోలుగా ఇటీవల పదోన్నతులు కల్పించిన విషయం తెలిసిందే. వీరందరి సేవలను డిప్యుటేషన్పై సచివాలయాలశాఖ వినియోగించుకోనుంది. పదోన్నతి పొందిన వారి జాబితా కొద్ది రోజుల క్రితం సచివాలయాలశాఖకు చేరింది.జిల్లా స్థాయి సచివాలయ పర్యవేక్షణాధికారులుగా జిల్లా పరిషత్ సీఈవో, డిప్యూటీ సీఈవో, జాయింట్ డైరెక్టర్ క్యాడర్ అధికారులను నియమించనున్నారు. ఇందులో 70% పంచాయతీరాజ్, గ్రామీణాభివృద్ధిశాఖ, మరో 30% పురపాలక, పట్టణాభివృద్ధిశాఖల అధికారులను డిప్యుటేషన్పై సచివాలయాల శాఖ తీసుకుంటుంది. నెలాఖరులోగా వీరి నియామక ప్రక్రియ పూర్తయ్యే అవకాశం ఉంది.