పదో తరగతి ప్రశ్నపత్రాల్లో మార్పులు

Updated on: 2025-07-31 07:37:00

పదో తరగతి ప్రశ్నపత్రాల్లో ప్రభుత్వ పరీక్షల విభాగం మార్పులు చేసింది. ఇప్పటి వరకు అకడమిక్ ప్రమాణాల ప్రకారం ప్రశ్నలు ఇస్తుండగా.. ఇప్పుడు ఆరు లక్ష్యాలతో పరాఖ్ విధానంలో ప్రశ్నలు ఇవ్వనున్నారు. ఈ మేరకు కొత్త ప్రశ్నపత్రాల బ్లూప్రింట్ లను పరీక్షల విభాగం బుధవారం విడుదల చేసింది. నూతన విద్యా విధానం ప్రకారం సమగ్ర అభివృద్ధి కోసం జ్ఞానం, పనితీరు అంచనా, సమీక్ష, విశ్లేషణ(పరాఖ్) ఆధారంగా ఈ ప్రశ్నపత్రాలను రూపొందించారు. భాషేతర సబ్జెక్టుల్లో నాలెడ్జకు 20%, అవగాహనకు 25%, అన్వయానికి 20%, విశ్లేషణకు 15%, మూల్యాంకనానికి 10%, సృజనాత్మకతకు 10% చొప్పున వెయిటేజీ ఇచ్చారు. ప్రశ్నపత్రాల డిజైన్లో ఎలాంటి మార్పు చేయలేదు. గతంలోలానే ఒక్క మార్కు ప్రశ్నలు 12, రెండు మార్కులవి 8, నాలుగు మార్కులవి 8, 8 మార్కులవి 5 ప్రశ్నలు ఇస్తారు. భాషా సబ్జెక్టులకు వచ్చేసరికి అవగాహన-ప్రతిస్పందనకు 24%, వ్యక్తీకరణ-సృజనాత్మకతకు 44%, భాషాంశాలకు 32% వెయిటేజీ ఇస్తారు. ఎనిమిది మార్కుల వ్యాసరూప ప్రశ్నలు 7, నాలుగు మార్కుల లఘుప్రశ్నలు 3, రెండు మార్కుల అతిలఘు ప్రశ్నలు 9, ఒక్క మార్కు లక్ష్యాత్మక ప్రశ్నలు 14 ఇస్తారు. 6-9 తరగతులకు సంబంధించి ప్రశ్నపత్రాల డిజైన్ లో మార్పులు చేశారు. 80 మార్కులకు రాత పరీక్ష, 20 అంతర్గత మార్కులు ఉంటాయి.